مشاركتي في برنامج فن المحكي.
.. ملحمة عيادة الحب..
طلبتْ منو بعيد الحب
ورده حمرا ومعها دب.
حتى يحتفلو بالعيد
ويحبو بعض من جديد.
بكرا إن كان الله بيريد
رح يغلا سعرو للدب.
اليوم وبكل الأحوال
صار الحب بدو رأسمال.
الله يساعد هالأجيال
عالطفرة معتّر هالقلب.
بالبيت بيكتب عالحيط
بالقهوة روميو وجولييت.
حياتهن كلها تخبيط
انشالله بيهديهن هالرب.
ياعمو حاجي تقليد
صرنا للفوضى عبيد.
بكرا باليوم المجيد
رح توقف يمكن هالحرب.
بدي حلفك بربّك
حتى هالبنت تحبّك.
وتتربع جوا بقلبك
لازم بدها قرد ودب؟
ضيعانك ياعيد الحب.
.. محمد عزو حرفوش..
ليست هناك تعليقات:
إرسال تعليق