فضفضة
***
أنا بكتب الشعر ليه ؟
يمكن بفرغ همي فيه
مش لاقي حد أكلمه
فبكتب اللي بحس بيه
بحبس دموعي جوه عيني
وقلبي يبكي من اللي بيه
ليه فرقتنا الدنيا وبقينا
لا يحس بيا ولا احس بيه
لا حد شاغل نفسه بيا
ولا حد بشغل نفسي بيه
ولا حد يبكي في يوم عشاني
ولا انا يوم هابكي عليه
كتابة الشعر بتوجعني اوي
واقرا الوجع وابكي عليه
مقدرش الوم حد في مشاغله
واللي يلومني اكيد سفيه
معرفش ليه ماتت المشاعر
وكل حاجة بتتحسب بالدولار او بالجنيه
ضاعت الأخلاق في دنيتنا
اسألني ليه ؟
تقدر تفسر لي سبب الإساءة
للي انت يوم أحسنت ليه
او تقولي ليه كل واحد شايف الحق
وعن الظلم غمض عنيه
او تشوف أصيل وخسيس يذله
والخسيس باشا وبيه
وفي الختام انا راح اقولك
اي إحسان انت عملته خليك ناسيه
ربنا وحده اللي عالم بالنوايا
وكل واحد بنيته ربي يجازيه
أنا بكتب الشعر ليه ؟
فتحت قلبي اقولكم ايه اللي فيه
***
حمدينو الشهاوي
ليست هناك تعليقات:
إرسال تعليق