..عيد..
اجا العيد يا امي
وجيتي ببالي
حبيت احكيكي شوي عن حالي
وقدي بعدك عم تسود الليالي
يا امي ولادنا بلا عيد
الايام متل بعضا ما في جديد
الفرح راح والحزن معشش بالوريد
كل الي ماتوا ماتوا مرة
ونحن كل يوم منموت مية مرة
عيشة نكد وايام مرة
مقضينا نتامل ونموت بالحسرة
يا امي مصيبتنا انو ولادنا متلنا معترين
عطيناهن الي بنقدر عليه ويقينا مقصرين
لانو نسينا نعطيهن اهم شي
بلد يعيشوا في
وهني مطمنين
نسينا انو كان لازم نحارب السراقين
والحرامية الي لبسوا بدل وصاروا نصابين
يا امي شو بدي خبرك عن حالنا
ابن السياسي وبيو عايشن من مالنا
ونحن متل المجانين بنحكي خيالنا
كهربتن من مالنا
سهراتن ضهراتن من مالنا
بندفع للي بيحميهن من مالنا
من رزقنا ورزق عيالنا
ونحن فرحانين
شفتي يا امي قديشنا مساكين
مبارح حفيدك قلي ليش خلفتني هون
احترت شو بألو وجي صار الف لون
وما عندي شي واحد يخلي يحب هون
لبناننا ما عاد لبنان كل شي تغير
حتى اللون الاخضر ما عاد اخضر
كل ما فتحنا طاقة لبكرا بتتسكر
وعنتر بعدو عنتر
عايش بالقصر وعلينا مسيطر
يا امي ربيتينا نحب الناس
بس زعمائنا مش ناس
بيوم واحد ببدلوا مية لباس
وكلن اوادم ما فيهن ازعر
وعنتر بعدو عنتر
يا امي يا ريت كنت بقدر
طمنك علينا اكثر
بس انتي بتعرفي ما بقدر اكذب عليكي
انا ترباية ايديكي
علمتينا الصدق والمحبة
وسقيتينا الطيبة حبة حبة
بس للاسف يا امي هيدا الزمن
ما بدو طيبين
والاوادم صاروا تحت الارض عايشين
الزعران عم يعلوا ويعلوا
والولاد الي كانوا النا عم يفلوا
خايف اوعى بكرا الصبح
ما لاقي قبرك بمحلو
لاقيك فليتي متل الكل
متل ولادي
متل طباق الفل
متل بلادي
الي اكلا الذل
..محمد غادر...
ليست هناك تعليقات:
إرسال تعليق