خواطر بعنوان :( ( ياخسارة )
مبخافشي من الايام
مهما الايام تعمل فيه
انا عشت خداع اوهام
ولافيش صحاب سالوا عليه
ياخسارة يادنيا
ياخسارة
الفرح فيك بالقطارة
والدنيا قسوة وغدارة
ونفوس اثيمة ودوارة
وقلوب حقودة وجبارة
وناس فاكرينها شطارة
ياخسارة يادنيا
ياخسارة
رصاص بيوجع بس كلام
ودموع بتنزل قهر ظلام
والحضن بقي حلم واوهام
وزمان ماكان الامن صمام
كان البشر عايشين فى سلام
ياخسارة يادنيا
ياخسارة
الكلمة صبحت امر مطاع
والكذب بقى حسرة وخداع
وقلوب تصدى لكن تنباع
مادام اساسها شرور اوجاع
ياخسارة يادنيا
ياخسارة
مافيش توازن بين الناس
والغدر سيف يطعن انفاس
حتى الفقير حلمه بينداس
بدون لارحمة ولااحساس
ياخسارة يادنيا
ياخسارة
بقي الاساس في الدنيا القرش
لازم تعيش في الدنيا فريش
مش كل حاجة تقول معلش
تنام تقوم بمليون وش
ياخسارة يادنيا
ياخسارة
نظرة امل لعيون الخلق
شيلوا القسي للنور والبرق
طفوا الضنى وهاتولنا الفرق
فين الدفي وجمال الذوق
ياخسارة يادنيا
ياخسارة
الفتنة صبحت امر فظيع
والمصلحة بقي حق الريع
والاكرمية حق سريع
تنحل بيه كل المواضيع
ياخسارة يادنيا
ياخسارة
بعض الصحاب طلعوا اوباش
مطمرشي فيهم عمر بلاش
عاشوا الحياة تدمير وطناش
نكروا وباعوا وحق مجاش
ياخسارة يادنيا
ياخسارة
طبع الاصيل عتاب وحماس
واقع بصيرة وكله حواس
وايدين وفية تساعد الناس
لآجل مايبقي الحب اساس
ياخسارة يادنيا
ياخسارة
معدشي ليكى صفاء وامان
عايزاني ابقي جريح ومدان
واعيش حياتى شريد حيران
بدون ضمان اوحتى امان
ياخسارة يادنيا
ياخسارة
اللى طبع ع الشر طريق
لابد ينكر وفي وصديق
جرىء وعاش في الدنيا برىء
ظالم وعاش فى الدنيا غريق
ومين تروح له في ساعة الضيق
ياخسارة يادنيا
ياخسارة
بقلم محمد عباس
الاسماعيلية مصر
ليست هناك تعليقات:
إرسال تعليق