تظبيط
،،،،،،،،،،،،،،،بقلمي هلال البنا
،.،.،.،.،.،.،.،.،.،.،.،.،.،.
ظبط غرامك بالأغاني
وافهم كلام المطربين
ركز وردد في المعاني
واسمع ل لحن المغرمين
رتب نظامك زيي حالي
ضاربها صرمه شمال يمين
شايفك ورايه و قدامي
ولا حد يقدر يستهين
ظبط وغير كل فلمي
وشطب وبدل ف الروايه
وهات كومبرس يأدي دوري
واعمل بطل بعد النهايه
رتب أمورك في التسالي
واسرح وسيب القلقالين
راح تلقى نفسك في العلالي
ويا النجوم السهرنين
ظبط مزاجك في الملاهي
واركب مراجيح المدينه
والعب براحتك مش في بالي
بس خلي العقل زينه
رتب حياتك في القهاوي
واسمع حكاوي ناس كتيره
من اللي هاوي واللي غاوي
واللي ماعندوش البصيره
ظبط وجودك مع صحابك
تبقى فريد بينهم عجيب
واللي في إيدك مش لغيرك
إياك تقول حرام وعيب
رتب معاشك جوا بيتك
دانك طين ودان عجين
لو حد قال ازي حالك
قول مش عارف انت مين
ظبط وركز يابني وافهم
واحفظ نشيد المنشدين
واقعد لشيخ واسأل لعالم
وابحث في شغل المبدعين
رتب نظامك تبقى زيي
ضاربها صرمه وماشي اغني
وشايف قدامي ورايه
ولا حد يقدر يشتغلني
ظبط وسيبك م الخيال
وافرح ياعم الدنيا عال
فيها النعيم فيها الجمال
خيول وحمير وبغال
رتب امورك يا جميل
ولا ترضى يوم تكون ذليل
لو حتى مريض وعليل
راح ييجي يوم وياه بديل
ظبط أمورك وانت غالي
واللي جرى ما كان في بالي
يا كلمه حلوه قلتهالي
ألفتها ولحنتهالي
رتب امورك بالغرام
خليك مسهوك في الكلام
والحلم هاتشوفه ف. منام
سلك أمورك والسلام
ظبط راسك واشرب شاي
وسيبك م الرايح مش جاي
دائماً فكر في المستقبل
والأسباب في إيدين مولاي
رتب غرامك بالأغاني
واسمع كلام المطربين
وافهم وركز في المعاني
واسرح في لحن المغرمين
.،.،.،.،.،.،.،.،.،.،.،.،
تظبيط
،،،،،،،،،،،،،بقلمي هلال البنا
ليست هناك تعليقات:
إرسال تعليق