الاسم رضا علي احمد ابو شنب
المنصورة /ميت غمر
قصيدتي الجديدة
(التعلب فات)
شفت بعيني التعلب فات
كان بيلف ما بين لاخوات
يطلع منده يروح للتاني
أو يتعشي معاه ويبات
تسمع منه كلام واغاني
يعمل طيب وابن ذوات
خلي الدنيا معاه بتعاني
خلي الكون مليان اشاعات
خلي السيد يضرب هاني
والاتنين صبحوا اموات
لما تقوله ومين الجاني
يعمل فيها الشيخ بركات
هو السيد أصله اناني
زي ما هاني بتاع حركات
واحد كان بيحب التاني
اما التاني بتاع عضلات
باع الود اوام في ثواني
كل الحب ما بينهم مات
لما التعلب اكل الضاني
مدوا أيديهم بالسلامات
شفت بعيني وكان قدامي
لما التعلب عدي و فات
******************
لَما التعلب عدي و فات
خلي خميسهم يبقى تلات
خلي النوم بيخاصم عينهم
خلي نهارهم يبقي ساعات
فرق بينهم خلي ضميرهم
زي الحب ما بينهم مات
كان بيصلي ويعمل منهم
كان بيزود في الكرامات
ربي عيالهم من منازلهم
والرجالة بقت** ستات
والستات بقي مين يحكمهم
بعد ما عم السيد مات
لبسوا الموضة وقلعوا هدومهم
عاملين فيها من الخواجات
باعو وطنهم كفروا بدينهم
لَما التعلب بينهم فات
*********************
ربنا واحد واحنا اخوات
ليه بنغالط في الحسابات
ليه بندخل حد ما بينا
واللي بنصبج فيه بنبات
ليه ياغراب جاي تعلمنا
ازاي نبقى من الاموات
وازاي ندفن كل ما بينا
علشان واحدة من الستات
علشان واحد يعمل عمدة
أو يعمل في البحر مغات
امتي هيرجع لينا ضميرنا
أو يقولنا التعلب مات
أو يقولنا التعلب مات
**************************
ليست هناك تعليقات:
إرسال تعليق