نصيحة من جدي
نصيحه قالها لي جدي من قديم الزمان
مش أي حد تخلص له يكون معاك انسان
منهم كتير ب وشوش أشكال والوان
اللي عامل حبيبك وصاحبك
وهو واد تِعبان
واللي عامل قدامك ملاك
وهو ف الأصل شيطان
واللي يضحك ف وشك
وجواه من ناحيتك غليان
واللي يطبل واللي يهلل
وماشي على حبل بهلوان
واللي مفيش ف بقه غير سيرتك
تقولوش ياناس بغبغان
واللي عايزك هيفضل ملازمك
ووقت م تعوزه في التوهان
حتى ف شغلك عامل حبيبك
ويوم م تمشي يتنطط سعيد فرحان
راح فين زمن الرجوله
وفين نلاقي ناس جدعان
بس برضه في ناس حلوه
زي الورد ف البستان
من غير غرض والنيه صافيه
يدخلوا القلب بلا استئذان
لو لقوك غلطان ينصحوك
ويدللوا النصيحه بالقرآن
لو لقيتهم إوعاك تفوتهم
دول ناس عفا عليها الزمان
دالحب ف الله عباده
وموجود ف كل الأديان
صدقت ياجدي ف كلامك
ما يكذبه إلا خسيس وجبان
** هشام فرغلي **
ليست هناك تعليقات:
إرسال تعليق