والعمر خلصناه بس قهر وبچانه بأحزانه
حتى اليودك ويسهر ليل وياك ملتهي بنيرانه
دار الوكت نتلفت ونخاف تسمعنه حيطانه
أقره رسائلك مليانه حب وشوق بكل امانه
وأگول ليش ربي تبدلت كل امورنه ودنيانه
كلام الحلو وسوالفنه إتبدلت والسهر أذانه
لا همسة لا كلمة ترد الروح والنفس تعبانه
لا خلگ لا واهس بقى وگلبي زاد هجرانه
محروس بالله يا عايش وحيد بالحزن مليانه
وگلبك جمر محترگ وملتهب من ناس بطرانه
لا يعرف يدگ بابك يجي وجاب اهله واخوانه
لاهو حاسم أمره ويطرگ درب ومطفي دخانه
هواية أيام عدت وكثر الكلام والناس فرحانه
ولاجاي يطلب صلح وماي النهر يعود لجريانه
ترسني الحزن ونقفل باب الفرح وتسكر بيبانه
موعودة إني بقهر من صغر سني وعيوني ذبلانه
و أدري مثل طير بسما ظليت مكسور جنحانه
هلبت تجي يافرح ويمتى تهل وتلون سمانه
ضاع الوفه والمحبه وليالي السمر بيها محلانه
حرت وحار الزمان بقضيتي وحبالها الكثرانه
شمعنه قافل عليَّ الوكت خبروني شسويت آنه
نامي يا بعد الروح وأصبري حال الزمن خلانه
صفينه نتوادع بحضن الليل وفارغه احضانه
ضاگ الوكت لا أيد تنمد إلي ولا ندفه بغطانه
يا وسفه ضاع الوفه وأنكر خلتي يا ريت وفاته
نشفت بعيني دمعتي وضيع المعروف وإحسانه
لا فكَّر بحالتي وما چنت أظن للموت ينسانه
بقلمي براق فيصل الحسني
ليست هناك تعليقات:
إرسال تعليق