/ مع الأبرار /
شفت الوقت مجروح جرحو وجّعك
وصار العمر مقتول مش رح ينفعك
جابي السما من فوق يا عادل دعاك
بلمح البصر غادرت تارك موضعك
متل النسر حلّقت في أعلى مداك
حضن الأرض ما عاد قادر يوسعك
تركت الشعر وتركت أحلامك وراك
عفت الحزن خدت الفرح كلّو معك
هالجامعة صارت ياعادل من عداك
حارة حزينة وكيف قلبك طاوعك
قبل القمر ما ينام تتركها بحماك
وما كان فيها عن رحيلك تمنعك
بس العزاء كبير من ألله العطاك
خبز الشعر خبز الأصالة وشبّعك
لمحتك يا عادل فوق مارق في علاك
على جنة الفردوس الله طلّعك
وطالع على دراج السما طلعة ملاك
انشالله مع الأبرار ألله بيجمعك
مهما غبت يابن حسون ما منساك
شعرك وشم ع البال فيه منقشعك
تركتك حلم غافي على الشباك
بلكي عند مايفيق فيه يرجّعك .
تعازينا الحارة للدكتور غسان منصور منصور عميد جامعة سوا ربينا ولجميع أعضاء إدارتها للفقيد الرحمة والمغفرة ولكم ولزويه الصبر والعمر الطويل
- عيسى فضة -
