تياب مهتريّة (محكيّة)
شو صار بدربي تغيّر
عا فجأة
ومن دون معاد
مبارح شي زرعنا القمحة
ما حلّو يصير الحصاد!
ليش الضّحكة صارت ذكرى؟
الفرحة
الهيصة والوداد؟!
ليش القدر حمل الدّمعة
حمل الغصّة
الحسرة والهمّ عليها زاد؟!
يمكن غضب من اللّه
ومفيلت على هالبلاد
شبح بلونه الأسود
سرق الطّرحة من الصّبيّة
ولبّسها تياب الحداد
كلّ النّاس عنده سويّة
الختايرة ، الشّباب
وحتّى الولاد.
يمكن عا كتر الشّر
وسهولة الأذيّة
وقلّة الخير
اللّي كان لدورنا عماد
ونسيان تصفاية النّيّة
والاتّكال عا ربّ العباد
تركت الارواح تيابها المهتريّة
وراحت تفتّش عتياب جداد.
عبير عربيد
ليست هناك تعليقات:
إرسال تعليق