/ باب السهر / شعر محكي
عا مفرق الأحلام واقفلي القدر
سلّم عرض والشوق بالقلب اختمر
ما كان فيي جروح روحي بلسما
غص الوقت وتشردق بدمعة وتر
وملهوف بدي حروف إسمك لملما
من العاصفة من تحت دعسات السفر
تا إرسمك بالورد ع شفاف اللما
طالع ع برج الليل ع دراج النظر
رح إقطف عناقيد عرّيش السما
وجبلك شي سلّة ضو من كرم القمر
وضوّي طريق الملتقى بهاك الحما
فتّشت كل دروج ذاكرة الصور
بريشة حنيني صورتك تا إرسما
بنبض القلب والحب برّات الخطر
وبحكي معك في كل لغات الوما
تا خبّرك عا موعدك ناطر انا
وفاتحلك بعز النعس باب السهر. د. عيسى فضة
ليست هناك تعليقات:
إرسال تعليق