يوم ما دق بوابي الحب
وقلي قلبي ﻻزم ..حب
قلت لو يا قلبي بتمون
عالروح وضي العيون
بس بعلمك خلي يكون
الما عندو يشتري كبير،،
ولحتى نقضي عالجوع
تبنينا اولاد الموضوع
قررنا نلغي الممنوع
ونراجع كل الاضابير
بدينا من راس الهرم
مصدر الجود والكرم
طلبنا بعض العشم
لقينا فوق علينا كتير
توجهنا لبيت الوالي
صاحب الشأن العالي
دفعنا الثمن بالغالي
والقصة مجرد تفكير
ولنصلح وضع الشاشة
تحركشنا بأبن الباشا
وقعنا بفكي كماشة
وعشنا عصر المسامير
خففنا نسبة العيار
رحنا نحب أبن المختار
ولع من حوالينا النار
وقال المي بهاك البير
ولتحظى بزهرة منتور
لازم توقف في الطابور
ولو نادى عليك المأمور
رفرف بجناحك وطير
وتنقل من ميل لميل
بين الخيالة والخيل
عل وعسى يحل الليل
وتحلم تصحى من بكير
ومتل البيتو من بللور
وعلى بالو سكنة القصور
رجعنا والخاطر مكسور
والحب بحاجة لتفسير
.....ناصيف شرباجي /سوريا.
ليست هناك تعليقات:
إرسال تعليق