رح حملك
ياطير هالكلمات...
زوادة عتب فيها عشرة عمر وزهاب...
ومن هالقلب رفات.....
ونبضات عم تبكي وجع
وتقول صحاب نحنا صحاب
ودموع بين جفون تندهلن ...
بتظل تشكي
ليرجعوا الغياب...
بحيات ربك ياطير خبرهن.
روحي لعندن عم تسابق النجمات
وعم تقطع دني وسنين بلكي
بتجمعنا فيهن نظرة فرح
عالباب...
وبلكي تعود وتقلي...
قديش مشتقلك
وتمسح بايدك دمعات منسية....
وهمسات
بتقولي حباب..نحنا حباب...
هونيك ...في حدا عم يصلي...على
ارض الوطن وتراب...
تعال
وشلحني بسمة زمن ألها ثمن
وحساب...
وحروف على سطور تشرحلك
قديش قراب نحنا قراب....
وننثر على حفاف الدني
شمعات مضوية
وقلوب عم بتصيح
نحنا
طياب....
تعال واحضني من برد كانون
من ريح عم تسابق
الغيمات
وذوبني شمع مع حكايات...محكية
واصل الحكي كلمات عم بتقول
راح الشتي وتفرقوا الديمات
وناطرتك لتقلي
رح يجي
الصيف ويرجعوا الشوبات
على البيدر يلي ناطر الغلة
لبوس رغيف الخبز والتنور
والعنبات والسلة
رموش السبل وجفون
هالقمحات
ليوم شوفك على البير عمتملي
بين نجوم حسنوات
وانتي قمرهم ونجمة
النجمات..
بقلمي:مفيدابوفياض
ليست هناك تعليقات:
إرسال تعليق