مع بعض طول العمر..
• إنتَ طلعتلي منين..
ما كنت عايشة حياتي هادية..
جيت قلبت الموازين..
وانا كنت عايشاها وراضية..
•• أنا كنت من غيرك مش عايش..
والدنيا مالهاش طعم ولا لون..
في قلبي رسمتك وناقش..
حلمنا في كل مكان في الكون..
• وكأني كنت عارفاك من سنين..
وكأنك في قلبي من أول الميلاد
معقول اتقابلنا بس من يومين؟
ونسينا المسافات وعدينا بلاد!
•• مش يمكن كنت عارفك من زمان؟
كان قلبي دايمًا يوصفك للعين..
وعنيّه تدور عليكي ف كل مكان..
واحلم بيوم ماانول منك لمسة ايدين..
• اسكت خلاص ما تكسفنيش..
دي عنيك بحور بتغرقني..
على إيه ناويلي متخوفنيش..
إزاي في وسط الناس بتسرقني..
•• معقول!
مكسوفة وكأنك لسه بنت عشرين!
ارمي توب العقل وتعالي بينا..
نحلم، نطير في الفضا بجناحين..
د احنا ما صدقنا اتلاقينا..
• خايفة..
أكون باحلم واصحى على الوهم أُدامي..
وسراب واخدني لطريق مسدود..
حاجات كتير كانت ف أحلامي..
وكان بيني وبينها سور وحدود..
•• بحبك يا مجنونة..
يا شايلة الخوف في قلبك وعَقداه..
وروحك درة مكنونة..
سيبيني د قلبك ده معايا دواه..
• ولو ف يوم نسيتني؟
أرجع لحيرتي من تاني!
وبعد ما دقت سعادتي..
ترجع ليّه أحزاني؟
•• اعترفي وقولي: إني حبيتك..
دنا اول مرة أحس باسمي..
ف يوم ما نادتني شفايفك..
أصبحت مجنونك رسمي..
• عايزني أقولك بحبك؟
وأتوه وقلبي يحتار..
أنا مش حمل عشقك..
ما خلاص قلبي اختار..
•••وهنفضل مع بعض
طول العمر..
بقلم د. أمل درويش.
ليست هناك تعليقات:
إرسال تعليق