بقلمي
هلال البنا في
قبه ومقام
-،،،،-،،،،-،،،،-،،،،-
مقام فيه قبه مضروبه
وفيها ضريح
مولد والحفله منصوبه
وفين الشيخ
وجايه الزفه مقلوبه
بدون تصريح
وساحه وعاوزه مساحه
صريخ في صريخ
وكوسه وقرعه مرصوصه
مع البطيخ
عزومه وخلق معزومه
من المريخ
حكومه وجايه محرومه
وطالبه طبيخ
سجق والحمه مفرومه
وكفته وسيخ
طبيخ الحفله متكلف
من الغلبان
وفرق العمله هيخلف
فى جيب أعيان
وبنت العمده قال تدبح
تلات خرفان
وأبوها العمده جاى يحلف
ماهوش كسلان
ماياكل منها ويدوقها
غير العميان
ولسه الزفه كام لفه
مديح فى الشيخ
وجايه وداخله كساحه
عجلها صفيح
و ساحه وعاوزه مساحه
وطالبه مسيح
نضافه وتكفي جرافه
قائدها كسيح
طينه والميه مطلوقه
فيها التلبيخ
مولد والحفله منصوبه
وشيخها قبيح
مقام والقبه مضروبه
مافيها ضريح
وكدب في كدب والكلمه
مافيها صريح
وفين الصدق راح يمه
مع المفاضيح
وفين الحق والذمه
مافيش توضيح
وفين العزم والهمه
ودارنا صفيح
مقام والقبه مدهونه
ولونها فظيع
عباية الشيخ مع العمه
ورق لميع
ويوم الحفله غنولها
تعيش ماتضيع
ميلاد والطفله مفطومه
وطفل بديع
ونعمل سهره و المولد
تلات أسابيع
وتبقى القعده محبوكه
وفيها مزيع
ووسط الزيطه والدوكه
مافيش مواضيع
وتبقى الدنيا مبسوطه
مع التطبيع
عشان في طفله قطقوطه
واخوها رضيع
وكل الدنيا مشغوله
عليه ليضيع
مقام والقبه مضروبه
مافيها ضريح
مولد والحفله منصوبه
وفين الشيخ
وطلعت زفه ملعوبه
بدون تصريح
أتاري الدنيا مقلوبه
يوم التصحيح
وكدب في كدب هليله
لطيم وصريخ
وكل الكدب في العيله
و شكل مديح
ونازله الدمعه زعلانه
دموع تماسيح
كلام علان وعلانه
ساهل ومريح
مريع ورعنه رنانه
مع المكاشيح
مزيع والمزه زنانه
لسانها فصيح
وعامله فيها غلبانه
ولابسه شحيح
ونازله طالعه مرجيحه
مع المراجيح
وليه الدنيا مرعوبه
من التسبيح
عشان الهبله مطروبه
كلامها جريح
وشايفه القبه مضروبه
وفيها ضريح
مولد والحفله منصوبه
وفين الشيخ
وطالعه الزفه مقلوبه
بدون تصريح
كوسه والقرعه مرصوصه
مع البطيخ
نابت والفته مخصوصه
سمك وفسيخ
مقام والقبه مضروبه
وفيها ضريح
؛؛؛؛-؛؛؛؛-؛؛؛؛-؛؛؛؛-؛؛؛؛
قبه ومقام
بقلمي
هلال البنا
ليست هناك تعليقات:
إرسال تعليق