***شروقي***
شارد بحلاك أنا يا أجمل الستات
يللي خيالك سكن بالقلب جواتي
بسرح ع سابع سما وبغازل النجمات
بعيون بتغزل حلا ع نول آهاتي
اتخرسن ع تمي الحكي وماضل في كلمات
وشو بكى دمع الوحي ع ضياع كلماتي
قزاز المراية انكسر وماضل في مرايات
مثلن عيوني أنا غرقوا بدمعاتي
روحي تلوب بحزن واتوقفوا النبضات
ﻷنو ع كثر البعد بيموتوا نبضاتي
نزلت دموع القلم ع خدود هالورقات
مابظن يقدر بعد يعبر ع لوعاتي
لو ازرعت بصخر الجبل شو بهالقلب عنات
بفتت قلب الصخر من ربع عناتي
من دم قلبي أنا عم أكتب اﻷبيات
ماحل اتردي بقى ع بعض آهاتي
وإن كان لقيتي قلب غيري أنا بالذات
وانسيتي قلبي الوفي وانسيتي ورداتي
تعي لنحرق سوا شو إلنا ذكرايات
ومن نار قلبي الشعل هاتي جمر هاتي
د. جوزيف رداح
ليست هناك تعليقات:
إرسال تعليق