بتتذكري يوم للي قلتيلي استوى التفاح
بلهجة خجولة كتير بتنقّط لطافي
ولمّا نعس هالليل وبلّش يلم الوشاح
وج الصبح جيتك أنا ومتلبك وحافي
ع الباب كنتي ناطرة وبإيدك المفتاح
وبيّك ع تختو كان عم يشخر و غافي
قلتي حبيبي فوت عا قلب القلب وارتاح
صار الهمس متل العسل معجوق ع شفافي
احمرّت خدود الورد هالأبيض الفواح
وجدايلك عم يرقصوا بهالليل ع كتافي
وفجأة ع باب الليل دقدقلي الصباح
شربنا سوا كاس العشق والشوق ع الصافي
ولمّا افترقنا رغم عنّا وراح يللي راح
بتذكرك قلتي حبيب القلب لا تجافي
بتتذكري ضحكت وقلت قبل الوداع
عندو العشق ياروح سبع رواح لا تخافي .
- عيسى فضة -
ليست هناك تعليقات:
إرسال تعليق