/ الأم والحقيقة / محكي
فرس الحقيقة كتير شدّوا لجامها
وأم الخليقة تكاتروا ظلّامها
بالفن حطوا التاء تا صارت فتن
وبين الألف والميم مدّوا لامها
وصار الألم يتعتّق بدن الشجن
والأم تشرب من خمر آلامها
من باب عرشو طل هالرب وصفن
شافا على مرصد شقى أيامها
من روحها بتشيل تا تدفع ثمن
عمر الطفولة وغارقة بأوهامها
لفّا بوشاح النور وعليها إئتمن
بحبّو غمرها وزاد من إكرامها
قلّا بحنانك زهّري وكوني وطن
كوني وحي أهل الدني وإلهامها
ومن يومها هالكون بالأم انسكن
ورد المحبة فاح عطر خزامها
صارت شمس هالعيد شمعة للزمن
ونهر الأمومة منهلو أحلامها
وكل ما بتمرق أم عا جسر الحياة
بتطلع دني مطرح دعس أقدامها .
كل عيد وأمهات الوطن الأحياء بألف خير والرحمة والسلام لأرواح الأمهات الرحلات . د. عيسى فضة
ليست هناك تعليقات:
إرسال تعليق