ذكريات أم شهيد..
صباحكْ خير يا إمي
يا وجع روحي
يا صور عم تمشي بدمي.
يا أوّل فرحتي
يا راسم بسمتي
يا نبض عمري
لو تعرف شو بتذكرك وشو بحبّك.
بتذكرك لمّا خلقت.. لمّا مشيت
لمّا جعت.. لمّا شبعت
لمّا مرضت.. لمّا شفيت
لمّا كبرت.. لمّا حبيت
بتذكرك لمّا رقصت ولمّا غنيت.
ايييه والله ياإمي بتذكرك.
بتذكرك واقف ع الباب
بتذكرك فاتح كتاب
بتذكرك بالسهرة مع الشباب.
بتذكرك مسجّى بالنعش
ع كتاف الأحباب.
بتذكرك مالي عليّ البيت
صرت صورة معلّقة ع الحيط.
بشوفك كل يوم نازل من الصورة
تبتسم لمّا تشوفني مقهورة
تبوّس ايدي
تمسح دمعتي
تهمس لروحي
ارفعي راسك يا إمي
وافرحي من جديد
كنت ع الأرض بطل
وصرت بالجنّة شهيد.
بخاطرك يا إمي
يا محتسبة يا صبوره.
تبوّس جبيني وترجع ع الصورة.
الله معك يا إمي الله معك.
كل يوم رح صلّي الفجر وادعيلك
واحضن الصورة لآخر العمر وغنيلك
وكل ما شميت البخور والعطر
وهلّت بشاير النصر اتذكرك.
الله معك.. الله معك يا خالد عند ربّك.
رح ابقى يا عمري اتذكرك.. واتذكرك.
آآآآآخ يا بنيي
ليش أنا نسيتك حتّى اتذكرك؟!.
.. محمد عزو حرفوش..
ليست هناك تعليقات:
إرسال تعليق