عيد العمال.. و إلى بعض ارباب العمل
للشاعر د. علي مسلم عجمي
------------------------------
عيد التعب و العرق و الزند المتين
بواحد شهر أيار عيد المنتجين
فلاح. معمرجي أجير و سنكري
بواب بستنجي و مخزنجي أمين
عامل نظافة و نص ثوبه مهتري
و متل الشتا بينزل عرق فوق الجبين
ما عاد زندو العامل بلحمه طري
صار قاسي و صلب مفتول و رزين
تحت البرد و الحر زنده الأسمري
شغَّـال يا يطعم ولادو الجايعين
كلما تِعِب بيقول يا نفسي اصبري
من البيت خلص الأكل حتّى و الطحين
بشتغل حتّى موت أهون من ثـري
أوقف عبابه بذل و بحميو مهين
يا أمم يا تواريخ يا شعوب اذكري
بأيار واحد عيد كل البائسين
****************************
إلى بعض أصحاب العمل
---------------------------------
إياك تظلم عامل و تظلم أجير
و تظن حالك صاير عليهم أمير
صاحب عمل خليك متواضع كتير
تصرف بحكمة عالم و نخوة فقير
إياك تظلم حدا و تقرر مصير
موظف حسب أهواءك و تشخر شخير
المظلوم في ربّو أكيدي بيستجير
و يا ويل ويلك من غضب الله الكبير
لولا تفاني موظفينك يا مدير
ما كِبِر مشروعك كِنت باقي صغير
و لا كان عندك فيللا ومالك وفير
و سيارتك في سعرها بتنقذ أسير
و تا ما يقولو الناس عنك مفتري
إياك تظلم عامل و تظلم أجير
الشاعر… د.علي مسلم عجمي
لبنان
ليست هناك تعليقات:
إرسال تعليق