السبت، 28 مارس 2020

حوار زجلي...... للمبدع رحال رحال

حوار زجلي بيني وبين

الشاعرة : (ميسا حلبي)

البداية : مدين 
شايف صبية روحها فيها نقى

وخدودها بتشبه حرير الشرنقه 

بحيثي انا مع اهل صافيتا صديق

بدي عروس تكون من هالملتقى
......................
ميسا:
بالملتقى مافي عرايس تلتقى

إعقل يامدين لاتزودها بقى

مافي بنت رح تقبل بشايب فقير

نكّس علام الحب أو روح احرقا
..............................
مدين:
شيبة سنيني بالوقار متوجي 

الغرة بشعري متل ورد بنفسجي

يمكن عليكي الرب يكتبلي النصيب 

في وقتها بتبقى ظروفك محرجي
.............................
ميسا:
حتى بحلمك لا تصدق هالحكي

ما في نصيب وروح للرب اشتكي

ما بينحرج غير الّي حلمو مستحيل

خيّط أماني تكون قدّك يا ذكي
.............................
مدين:
الشكوه لغير الرب إذلال وخنوع

أمري لربي بشتكي قبال الجموع

جايي انا ومحبس الخطبة بجيبتي

مافي حدا من الفقر رح بيموت جوع
..................................
ميسا:
عندي حبيب عيون قلبو بعشقا

وروحي بروحو متل خيط معلقا

ولو كل اهل الارض قالت مستحيل

رح أنطر لآخر حياتي هاللقى
...............................
مدين:
عندك حبيب الروح الله يسلمو 

وعندك وفا ودمعات عينك علّمو

مازال ياميسا كسرتي خاطري

قولي ابن رحال الله يرحمو
..............................
ميسا:
يرحم ترابو اللّي على حالو جنى

وع رمل وهمو عمّر قصور المنى

من غير علمي جاي تعشق يا حلو

الأحلام ع أرض الحقيقة بتنبنى
................................
مدين:
رحال شاعر عبقري وعاشق حزين

بيكتب حروف الشعر بمحبة وحنين

يمكن ي ميسا القلب عندك من حجر

وروحي انا بلسم جروح العاشقين
................................
ميسا:
قلبي أنا مسكون بالحب الوفي

مجروح.. من بَعد الأحبة ما شفي

ومجنون ليلى جاي عم يشكي الهوى

مو ناقصو إلا التشرد والنفي ..
................................
مدين:
عيشي ي ميسا نهارك بأجمل صباح

وآنسي جروح القلب واللي راح راح

بحيثك على قلبي حكمتي بالنفي

مجنون ليلى بعيش عمري ع النُواح
...................................
ميسا:
ماشي على دروب المحبة والغزل

وعم تغزل الأحلام بخيوط الأمل

خلّي الأمل قاعد ع رفّو ومرتكي

يا شاعر الأوهام بيكفي دجل
..................................
مدين:
رحال شاعر منبري وطبعو عنيد

عيبي عليي بالدجل امشي اكيد

ن سالت قريحة شعرنا طافو البحور

وبيضل بالمخزون في عندي رصيد
........................................
ميسا:
رحال يا رحال لا تمشي ورب

ولا تشلف الأشعار بين شرق وغرب

خلي حروفك والمعاني راكزي

مش هيك ردات المعنى بتنكتب
....................................
مدين:
رح بشلف الاشعار عاهالميلتين

بشرق وغرب تا صير نجم الفرقدين

ولما بواجه شاعرة بضعفك انا

بخلي جوابي ضعيف تا نمشي التنين
..........................................
ميسا:
يا فرقدان الليل. مكسوف الحرف

يمكن نسي التعبير أو يمكن خرف

لا تحط أوصاف الركاكة بأحرفي

يا ريت يا شويعر بضعفك تعترف
.......................................
مدين:
شويعر انا مع بنت في عمر الزهور

وجايي انا تارشرش عليكي العطور

كرمال اسمك جنب اسمي يرتقي

ت يكون اسمي معلم وفيكي فخور
.........................................
ميسا:
خلّي عطورك بالقناني مسكّرة

أو رشّها بالبيت ع تياب المرة

إسمي أنا من غير إسمك مرتقي

وحروف إسمي مسطّرة بالمسطرة
.....................................
مدين:
بيكفي بقى تزيدي على قلبي جروح

ظلمك ع روحي جار قلبك مش سموح

احكي بنعومة شاعرة عامنبري

قلبي غريق وطوفتك طوفان نوح
.......................................
ميسا:
حرفك هزيل وميت ومن دون روح

وقاعد على شط الهوى تبني صروح

بطوفان شعري رح بجيب نهايتك 

وخليك تنزح لوقبل فيك النزوح..
.....................................
مدين:
بنزح متل نسمة هوا وبإختصار

متل الورد مشكول عاامو زرار

رحال شاعر منبري وبإفتخار

وبشعر ميسا شفت اجمل ابتكار 

طلعنا سوا بالمعركة انتي وانا

متل الجسد والروح في اجمل حوار
..........................................
ميسا:
للشعر.. قلب وروح بحروفي انجلا

منّو العطر فوّاح ع كتاف الحلا

وع منبر الأيام بالحزن اعتلى

وما خان عمروالود أو خلّو سلا

وشِعرك إبن رحال للعالم دليل

حتى الفقير بيعشقو بعز الغلا......
....................................
شكرا لكل من تابعنا وتفاعل معنا

ليست هناك تعليقات:

إرسال تعليق