===≈====================
قاعد قبالي مِتل الحجر صامت
لا حكى كلمة ولا ملامح وجهه بانت
عاملّي فيها تقيل وعقله بالمجد شامت
وهوّي من جوا راديو مخرّب كبساته
عامل وضعية الصامت وبالع حكي كتير
وعيونه متل الرادار بتلقط حتى الطير
بيعدّ الأنفاس وبيدقق بشو بيصير
وبالليل بيفتح سوق الجمعة بلسانه الشرير
متل العجايز بقعدة ضحى وأمسيِّة
بيحللوا الضحكة وبيفتوا بالنيّة
شفتوا فلان شو كتب ومن وين جاب هالفهلويه؟
وهنّي عطّالة بطّالة والعيشة مية مية
بيراقب العثرة وبيستنى الزلة بشوق
كإنه ماسك على رقاب الخلق صكّ الحقوق
وبالكواليس بيصير الفصيح واللّبق والذوق
وبيهمس بالسر سمعتوا .. قال الأفندي صار فوق
يا صنم هادي يا بطل نقل الحكي
تعبت عيونك من المراقبة وبقي لسانك متكي
لو تستهلك طاقة النم بشي شغلة أو حكي
كان صار عندك مستقبل بدل هالفزلكي
بدي قلك شغلة.. وحطها حلقة بـهالأذان
إنت بتراقب القمم وإنت لسا بالقاع غرقان
خليك عم تهمس وراي متل ختيارة أم لسان
لأني بعرف الناجح دايماً بيحرق قلب الكسلان
ملاحظة: لمن يشعر أنه المقصود، إذا وجعك الحكي اعتبره (ماسك لوجهك) بلكي يحرّك فيك شي عضلة بدل الصمود الصنمي
غسان منصور منصور
ليست هناك تعليقات:
إرسال تعليق