.. ألو.. وينك؟
بغار عليها بثور بجن
لو جوّالا مرّة رن
رح يهمسلا بِ دانا
ياويلي من سوء الظن.
يخرب بيتو هالجوال
غيّرنا من حال لحال
صاير صالون استقبال
فيه مجمّع إنس وجن.
تيوب وفيس وانستغرام
عيشتنا صارت أوهام
بيدخل معنا عَ الحمام
الظاهر عَ الميّه بيحن.
شو درجت صور السلفي
مبوّز والعالم خلفي
كلشي مبيّن مو مخفي
يسلملي تكتيك الفن.
ضاع الصالح بالطالح
وكترت عنّا الفضايح
يا عالم لَ وين رايح
ضيّعنا السلوى والمن.
كلشي صاير عَ المكشوف
غندورة بْ تجر ألوف
واحدهم عايش منتوف
يزقزقلا متل البو حن.
قالوا هيدي الحضارةا
فيها الدنيا وأسرارا
عَ النت عملنا زيارةا
لْ مابيقدر يحكي بيعن.
.. محمد عزو حرفوش..
ليست هناك تعليقات:
إرسال تعليق