( ؛ ؛ ؛ بنغني ليكي ؛ ؛ ؛ )
بنغني ليكي يا بلدي
وصوتنا مش طالع
متعرفيش م الخوف
ولا النغم خايف يقول
ومش راجع
ولا الوتر مقطوع والعُود ولا نافع
ولا الأمل موجوع
فى الحلم بينازع
ولا نهارك بغيم طوِّل ومش قانع
بأنك تكوني سبيّه
أو حتى محظيّه
لكل خسيس طامع
متزعليش يا بلدنا
مهما الضباب يكسِي
دا الصُبح بُكره يشتتُه
والميّه فى الغيطان تجري
والزرعّه من فرحها
تناغي الوِلدّ وتسمِّي
يضرب بفاسُه يبتِسم
حبّ العرق
فوق سواعدُه ويهنّي
من رحيل الغيم
مع الظلام والليل
ونايّنا مستني
ساعة ميسطع قمر
يدندن فى ليلنا ويغني
كل الطيور ع الشجر
فرحانه من فجرنا
ما الفجر ياما غِفي
والوِلد ياما اتكِفي
يجري وينده فى الفضا
على حق مش راجع
بصي فى عنيه تلاقي سلسبيل دامع
بصي فى ملامح سحنتُه
يا عيني م المرار طافح
بصي شوفي وحققي
واوعِي تنسي اْللي
فى يوم نازع
كان يقول بلادي والله ما انا راجع
كان يقول
ظلامنا لازم ينتهي
واموت واقف ومش راكع
بغزل كرمتي توب
خيطُه أمل ساطع
من بكره رايح ألبسه
واقلع الطامع
يمكن فى يوم يتعِدل
ويرتديه قالع
....... .... ... .. .. .
أحمد الصاوي مصر ١٥ / ٤ / ٢٠٢٠
ليست هناك تعليقات:
إرسال تعليق