خلص الكلام { شعر محكي }
ماعد في حكي خلص الكلام
لي كان امبارح حلم صار أوهام
ودارت الدني وضاعت الأحلام
ولي كان حبيب غيرته الأيام
مافي عتب مافي عندي ملام
الحب ضاع متل ماضاع السلام
والحرب صارت جواتنا ما بتنام
والفكر صار شريد والشارع ظلام والبيوت فضيت غطاها الركام
وين لي كانوا للقلب دوا ومرام
راحوا وتركوا لنا الوجع والملام
ياحسرة راحت أيام لي كنا ننام
وراحت كتير أيام وإجت أيام
وكل ما بتجي إيام بتكبر الأحلام
وبنتمنى لو بترجع هديك الأيام
نكتب قصص ونقول أحلا كلام
بس خسارة نشفت حبرها الأقلام
ومعد في حكي خلص الكلام...
تهاني سلطان...
ليست هناك تعليقات:
إرسال تعليق