كرمالك
كرمالك بدي اسكر عبيلي الكاس
طفي ناري وهدّيني يابنت النّاس
بحبك ضيّعت سنيني وقطعت الياس
دبحتيني بسيف عيونك والقلب احتار
سحر عيونك جنّني ياام الخلخال
خلاني جن وعبّي المي بغربال
لو لحظة رفّوا رموشك من فوق الشّال
بتضوّي نوار الكون وبيصير نهار
عطشان ومابيرويني غير شربة مي
غطيني برمش عيونك بردان شوي
شافوني صبايا الحارة وقالوا ياخطي
مضيّع عقلو وبقلبو شعلانة النار
جنّيت وماعاد اصبر وين بدي روح
انت الحب الّلي بقلبي طيّب لجروح
بغيابك طفل مهجّر ببكي وبنوح
طفّي نارك حرقتلي كل الأفكار
لعيونك بدي سجّل أجمل موال
واحصد من ورد خدودك شي مية شوال
طعم شفافك عنّاب مخمّر بالهال
وجعودك شال مصفّف فوق الزنار
من عيونك بدي غازل نجمات الكون
وصارع بالحب فنونك والموت يهون
من نظرة حرقتي قلبي والحب جنون
صاير من كحل عيونك هالليل يغار
هلّق جبت القنينة وعبيت الكاس
طعنت قلبي بسكينة ومات الإحساس
زرعتلاجنينة ورد ونرجس مع آس
شكيتا لربي العالي وحدو القهّار
لما بتضحك لي عيونك والبدر يهل
نجمات الكون بتخجل تضوي وتطل
قلبي صاير مفتونك ياست الكل
كلن صاروا ينادولي جن الختيار
بقلمي : عمادالدين سليمان
ليست هناك تعليقات:
إرسال تعليق