هواجس تالي الليل....
يا خوي...
من تسألني عن حالي و الاحوال
ما عندي على خفاها عنك وسيلة
ترى كتم الأحاسيس و الصبر قتال
و البوح بيها أغلب الأحيان فشيله
لو كل ما يجول بالفكر يهدي البال
ما كانت الهموم اللي بالقلب ثقيلة
هموما نزلت عالقلب مثل الجبال
و أرد بلاها و وساوسها كل ليله
لين جاتني كما الصخور الثقال
توقد شوق الخل اللي فقد خليله
من قالوا هدت أقول لهم هذا زلزال
و من قالوا طاحت أدور لهم حيلة
ومن خالطها قول مخاطيل جهال
تصير السالفة من بعدها طويلة
ودي أسالك يا بدر الليل سؤال...
ما شفت روحي من الهموم عليلة؟؟؟
شيال حمل أنا ما تحمله جبال
أمانه... و خونة الأمانه فشيلة
أشيل هموم العمر و تعبة البال
و أمشي بعزة نفس ماهي بذليلة
يا كثرما إلتقيت بها الدنيا من أنذال
من كثرهم ظنيت أن النذالة فضيلة
يا كثر ما سقط من عيني رجال
كنت أحسبهم من الوجوه القليلة
صدق فيهم قول ابن العامر جمال
راعي النخوة ولد شيخ القبيلة
هذا الزمان يبيله لسان مقوال
و لاطاح الكريم مالقى من يشيله
الله أكبر تغيرالزمن من حال لحال
و صار الخليل غادر بخليله
و النخوة انباعت من غير دلال
و ربت نفوس البشر على الرذيلة
و صار السفيه راعي قهوة و دلال
و صار الكريم يا ابن عمي بلا حيله
والنذل اللي كان بالخسة مضرب أمثال
صار اليوم وجيه من وجايه القبيلة
غدار هالزمان ياابن العم عللي حظه مال
هان الكريم و رفع اللي نخوته قليله...
....... و سلامتكم....
الشاعر: بشار المفعلاني....٢٠٢١/٦/٣٠
ليست هناك تعليقات:
إرسال تعليق