...(( يا عيد ))… .…للشاعر د. علي مسلم عجمي .
يا عيد كيف رح تمرق عليي
من دون ما إحظى بعطف بيي
و لا صوت إمِّي عالصبح بكير
يقول طل العيد يا بنَيّي
يا عيد لو تتأخر شويه
شوف الكورونا شو مسوّيه
فقر وغلا و في فساد كتير
و تجار أكترها حراميه
صوت القدس يا عيد بيناديك
عالمسجد الأقصى إلو يوديك
و تراب من مسرا النبي يهديك
بدم الشهيد بفخر مطليّه
هالسنة يا عيد ما في عيد
حرب و دمار مذابح و تشريد
بالعين حرقة و بالقلب تنهيد
و أطفال محتاجة لحنيّه
ملاعب الأطفال ما فيها
أطفال تلعب في أراضيها
و ما في ولا لعبة تناديها
نفسية الأطفال مذريّه
يا عيد عم مننام و منوعى
و الكهربا بتظل مقطوعه
و أكتر بطون الناس موجوعه
ارتفعت الأسعار الغذائيه
كلنا انحجرنا بهالظرف بالبيت
و صار الحكي بالهمس عالسكيت
و ما في مازوت و بنزين و زيت
و الخبز سعرو نار مكويّه
رجعنا نضوي البيت عالشمعه
معدل سبع تيام بالجمعه
و الكورونا سئء السمعه
خلا قلوب الناس مطفيه
تأخر شويه ما تجي يا عيد
الدولار كلما بيرتفع و يزيد
و الطفل بدو يحس في شي جديد
و بتعرف الجيبه مهتريه
بِلّغ صحابي و إخوتي عني
أجمل تحية من القلب منّي
و قول لهم يا عيد مستني
تموت الكورونا و نرجع سويه
الشاعر . د. علي مسلم عجمي
لبنان
ليست هناك تعليقات:
إرسال تعليق