كتبتها رثاء للشاعر عبدالرحمن الأبنودي في العام ٢٠١٥
***********
أحكي عنك ولا أسيب قصايدك تتكلم
بس سيبني شويتين أصلي بتألم
ياخال عبدالرحمن
يا ابن أبنود يا جناوي يا أصيل
في زمن قلت فيه الرجولة
والمرجلة
والكلمة الحلوة
والمجدعة
ده إنت اتربيت في النجوع
زمن الفقر والشمس والأجساد
شبه العارية
والشمس بتكوي البدن
والموت واقف في حضن الجبل
بيحكي عنك أصعب حكاوي
وصديقك أمل دنقل لما هرب وياك
وجيتوا البندر تشقوا الطريق الصعب
كأنه من الصخور منحوت
ها أقول إيه في وداعك يا خال
مش لاقي كلام وأنت أستاذنا في الكلام
وكلامك زي الرصاص بيخترق عقولنا بيصحينا
واحنا زي الأموات -
مصر مش هاتعوضك أصلك نبت أصيل
أصل إنت طول عمرك جدع وشهم ونبيل
والشهامة مش كلمة بتتقال
دي مواقف بتبين معادن الرجال
كتروا الكدابين ياخال
والمطبلاتية والمنتفعين
وماسحي الجوخ
ولاعقي الأحذية
ياخال سبتنا ف زمن صعب
زمن مايعلم به إلا ربنا
شايفين فيه الكلاب المسعورة
سنانها مسنونة
علينا وبتتهمنا في الإيمان
بتتهمنا بالضلال والغواية ياخال
فاكر الأزهر ياخال
لما اتصدى لجحافل الاحتلال
فرنساوي على انجليزي على أمريكاني
دلوقت ياخال عايزين يقفلوه
يقفلوا منارة الإسلام
اللي خرج منها الرواد
والأعلام والقامات والرايات
عايزين يقفلوه ياخال
عاجبك كده يا خال
هانقول إيه وللا إيه
الله يرحمك يا خال
الله يرحمك يا أبوآية و نور
طه هيكل
ليست هناك تعليقات:
إرسال تعليق