يابياع الصبر...... مواااال.....
يابياع الصبر قولي الكيلوا بكام
محتاج منك أشتري عشان أصبر عالأيام
ورجح كفة الصبر عشان تصلب مع الألام
أيام صبحت مريرة وعيشينها والسلام
..........
وبحور المحبة جفت وصبحت برك معدوم
وأيام الوجع زادت والقلب إمتلئ بهموم
حتى النظر فى العين صبح من الشوف محروم
دا قلة البخت خلت إبن الأصول مظوووووم
......
قال بياع الصبر يا إبني الصبر مش بالكيل
الصبر يا مبتلي بيتزرع بالفدادين
ياما ناس صبرت عالذل لحد ما راح الحيل
وزرعنا فدادين ولكن هنوزعه على مين
.........
أنا كنت فى صباى زي الوتد واقف
وكنت للرجولة عنوان وقولي قديها
ساعة إسمي يتذكر تلاقي شنابات واقف
ومش كل المواقف ساعة الجد تعديها
.........
الدنيا يا ولدي زي ورق مع زهر
بتلعب حظها مع إللي عايزاه
لوعطتك يوم بالغلط بتقلب عليك شهر
زي الغزية بترقص للكل بس بتروح للي ريداه
..........
الزمن طول عمره قاسي ولايحنش
ومطوق عليك بحديد مايلينش
ساعة يشوفك يعمل أعمي ويطنش
والمية من تحت إيدية متسيلش
........
أصبر على الزمن وبلاش تشتريه غالي
دا ياما ضحك على ناس وغواها
ومهما ربنا يديك بلاش تطلع في العالي
ياما ناس طلعت فى العالى وجات لحظه ونفاها
........... شاعر الشعب أحمد خلف الحامدي...........
ليست هناك تعليقات:
إرسال تعليق