/ عيدك عرس شامي / محكي
يا شام مدّي شرشف الغفران
وغطي الوطن وتكحلي بنيسان
واتهودجي عيدك عرس شامي
عيد الفصح عيد الفطر إخوان
حملنا الصليب بنور إسلامي
دعسنا فكر موصوف بالكفران
بصلّي ل ألله بعيد القيامي
يقوم الوطن من فرشة الأحزان
وموعود تخلص كل آلامي
وإنتي معي رح غافل الحرمان
بعيد المحبة وزور أحلامي
انشالله بعد ما تغيّر العنوان
غزلت الأماني وجيت لا تنامي
تا عايدك يوم المنى وفزعان
يمرق عتم مجنون قدّامي
واتفركش بدمعة طفل جوعان
واتزحلق بضحكات الحرامي
وهيك الوجع ما يكون بالحسبان
يا عيد رح يولد وطن سامي
بكتير أحلى كتير مما كان
ويلبس وطنّا تاج هالعيد السعيد
تاج السلام مطرّز بفرسان .
- عيسى فضة
ليست هناك تعليقات:
إرسال تعليق