هالعيد جايي ع العتم جابي
ولابس قميصو بلون عنّابي
بعز الشتي عا صوت هالمزراب
بكف التلج بيدق عا بابي
لا كهربا ولا غاز لا أحباب
وعم ترجف من البرد أعصابي
تلبكت يا بفتح أنا هالباب
والضو مطفي وفاضية جيابي
يا بضل جوّا إبرم الدولاب
وسجّل حضوري بدفتر غبابي
وقبل الوقت مايكون شعرو شاب
فتحت وأنا ع الباب جنّابي
قلّي ياغالي زهّر العنّاب
والعيد كاسو اشتاق للخابي
قلتلّو وقّفلي معك في حساب
بدّي معك صفّي السني حسابي
يا عيد حتى يرجعوا الغيّاب
جمّد رصيدي بمصرف عذابي
بتاني سني انطرني تجيب تياب
ولف الهدايا وإلبس تيابي
حتى المحبة تعود بعد غياب
بلكي الوطن بيكون جرحو طاب
وتشفى السعاده ويرجعوا حبابي .
- عيسى فضة
ليست هناك تعليقات:
إرسال تعليق