بعتذر يا أمي
ما كتبتلك وصيّه.
كنت بعتقد اللي متلي
بَعيد المنيّه
تاري الحقد أعمى
يا أمي
وما بيعرف الأحكام السماويّه.
بعتذر يا أمي
كنت حابب شوف بسمتك
لمّا خبّرك إنّي جبت عشرة
متل ما وعدتك.
سامحيني يا أمي
ما لحقت شفتك.
سامحيني إذا بسببي
نزلتْ دمعتك.
يا أمي كنت ماسك بإيد اختي
متل ما وصيتيني
بقيت ايدا بإيدي!
وما عدت شفت أختي بعيني.
يا أمي اليوم المعلمة
عطتنا وظيفه
نكتب موضوع
عن أحلام الطفولة!
ما بعرف إذا كان لازم اكتبا؟
أو يمكن تعذرني معلمتي
لإن ما كنت عذّبا؟
قبل ما انسى يا أمي
خلّي كتبي معطّرة بدمي
وضبي تياب العيد بشنتي
وحطّي عليها صورتي
واكتبي اسمي الجديد
ابني الطفل الشهيد.
بخاطرك يا أمي
بعتذر ما كتبتلك وصيّة
بعتذر ما كتبتلك وصيّة
بعتذر ما كتبتلك وصيّة.
.. محمد عزو حرفوش.
ليست هناك تعليقات:
إرسال تعليق