بقلمي
هلال البنا في
مش قاعد
--------
أنا واقف ومش قاعد
ورغم الوقفه تعباني
لاهو تمثيل ولا معاند
لكنه حس إنساني
أنا شايب ومش عايب
وعزت نفسي عجباني
واقف ساند لكن صامد
وياما الدهر وراني
أنا الغايب مالوش نايب
وعمر الحظ ماداني
ولو قاعد باكون ساند
إرادتي وبس سنداني
وليه يادهر بتعاند
وسايب الدنيا ظلماني
فلان قاعد مالوش قومه
وصعب القومه من تاني
نايم ليه طالت النومه
لازمله دعم إنساني
وكام جاهل جاحد غافل
تقوله يقولك إنساني
عايش مرتاح شارب واكل
هافكر ليه في شيئ تاني
وكام وحده مات الراجل
وكوم خلفه ومافيش عائل
وخلوا معاش وراح ولاجاش
وتشحت لقمه من عاطل
وانا واقف قاعد شاهد
مشوفتش حد بيساعد
فين النخوه باين ماتت
ماعدش حد بيساند
قايم قاعد شايف حاله
عيال تاكل من زباله
بياخدوا اللقمه في لهفه
ودمعة عيني شغاله
بياكلوا العيش قديم بايت
وعين الأم مش نامت
تلات تيام أكيد جاعت
وبحلفلك بألف يمين
في ناس غيرهم أكيد جعنين
وفي تاني وفي تالت
ورابع زي قرايبنا
ندق الباب نمد إيدنا
وبعض الناس بيدونا
وبض الناس بتطردنا
وانا واقف سامع شايف
باقول الحق مش خايف
عشان واقف ومش قاعد
ورغم الوقفه تعباني
وللا تمثيل ولا معاند
لكنه حس إنساني
------------------
مش قاعد
بقلمي
هلال البنا
ليست هناك تعليقات:
إرسال تعليق