أخلاقنا ضاعت ؟؟؟!!!
***
ياللي فرقتوا الأحبة بالكلام
ياللي خليتوا الناس تقابل بعضها
مكشرين من غير سلام
هو انتوا بالله تعرفوا معنى الحلال
ولا سمعتوا عن الحرام ؟!
فيه حد فيكم يحط رأسه
على المخده ، يعرف ينام ؟!
اوعى تقولى ان الزمان ده
ما ينفعوش غير اللئام
ما ينفعوش إنك تعيش فيه محترم
في وسط جيل كله شمال او مش تمام
لكن السؤال اللي عندي أخلاقنا فين ؟
ما تقولش تاهت مننا وسط الزحام
او تقولي ان أخلاقنا حاجات قديمة
وكلها اترمت وسط الركام
كنا زمان نعطف علي الطفل الصغير وعلى
الضعيف ؟ اما الكبير ليه مننا كل إحترام
كنا زمان بنوطي صوتنا ونمشي علي
مشط رجلينا عشان ما نزعجش اللي نام
احنا اللي كنا نحمي بنات الحي ونغار عليهم اخلاقنا ليه اتغيرت ؟ ونعيب على الايام ؟
كنا نخاف على مشاعر بعضنا ، دي الوقتي
قول على الأخلاق و ع الدنيا السلام .
لو كانت الأخلاق في السوق بتتباع
انا هشتري ومش هسأل بكام .....
وفي النهاية هقولكم هو ايه حسن الختام ؟
نطق الشهادتين والصلاة علي النبي خير الأنام .
***
حمدينو الشهاوي
ليست هناك تعليقات:
إرسال تعليق