.. محكيّة..
.. غزل..
يا هوى ديرْ بالك عَ شعراتها
حنْ شوي عليها وعَ وجناتها.
احمل معك من دموعي غيوم
رطّبْ يامطر تحتْ دعساتها.
بحبها مابعرف كيف بدّي طِيب
وكيف فيني اصبر عَ غيباتها.
تعب قلبي من كتر هالمكاتيب
اللي بتشتهـي تحضن كلماتها.
روحي مسلطنة متل عندليب
ينظم قصيدة عشق بِ فيّاتها.
ياخدها شو بحسدك لمّا تبكي
أوّل مَ بيحرقك دفا دمعاتها.
لحظها يرسـم للهوى عناوين
سبحان الله اللي خلق غمزاتها.
شفتها كأنّي بعرفا من سنين
وعمري مفطوم على بسماتها.
بتشفي روحي من علتي بطيب
لو داعبتْ خدّي بِ لمساتها.
يسكر قلبي عن الدنيا بغيب
إن رشفت مرّة من خمر شفّاتها.
يا رب من سكرتي مابدّي فيق
إذا ما تشابكت دياتي بديّاتها.
.. محمد عزو حرفوش..
ليست هناك تعليقات:
إرسال تعليق