بصابيع فكرو كان عم يرسم صور
وكان النعس موقوف ع جفونو
متل الكأنو كوكب الأرض اختصر
بلوحة غريبة بتشبه جنونو
قلبو نشف قام وعصر غيمة مطر
تا يبل ريقو وتخلص ديونو
فجأة ع غفلة فات عا بيت السهر
مطرح ما كاس وطاس بيكونو
معمي ع قلبو دعس برّات النظر
تزحلق وقع وتكسّروا فنونو
تعمشق ع سطح الليل تا يقطف قمر
تاري القمر مقطوف من دونو
تفركش بغيمة وصار بيلمح البصر
يتدحرج ومن فوق ع ظنونو
ولمّا ع وجهو طب عا بالو خطر
يمحي عمى الألوان بعيونو !!!
- عيسى فضة -
ليست هناك تعليقات:
إرسال تعليق