وحدك حبيبي.... للمبدع عيسى فضة

(    وحدك حبيبي   )  شعر محكي
بعرف حبيبي  غيبتك  كانت  قدر
والبُعد إلزامي
كل ما عَ بال الذاكرة طيفك خطر
بشوفك قمر شامي
مارق مابين رموش عيني والنظر
بتفيق أحلامي
وبترسمك عا لهفتي بأجمل صور
تتكون قدّامي
بنطر  عَ باب  الليل  تَينام  السهر 
ياعيون لا تنامي
راجع حبيبي اليوم من غربة وسفر
متل الوطن سامي
بطلع عَ برج الشوق  بقطفلك  قمر
ومن ضو إلهامي
بضوّي طريق الملتقى وبمحي الخطر
وحروف أوهامي
وحدك  حبيبي المبتدأ  وأنت  الخبر
مني وعد إبقى إلك كلّي إلك
تتقوم القيامي  .              /  عيسى فضة  /