/ هيك ابتدا المشوار /
كانوا بآخر يوم من عمر السنة/ي
ليلة سهر بتغص بالسهّار
وكان العشق معجوق ببيوت الدني
وقلوب عم ترجف مع الأوتار
الساعة تنعش والليل بيودع سني
فاقت ع دعسات القمر جلنار
دق الجرس واستنفر الحلم الهني
ونحنا سوا كنا ع قيد الانتظار
جن السهر عنّت ع بالي الشيطني
شلحنا العتم بين التلج والنار
لبسنا تياب الضو تحت السوسني
والكاس عم يرقص مع الزنار
وآخر وقت لمّا نعس راس السنة/ي
واحمرّ خد الليل والنوّار
تركنا السني وفتنا على تاني سني
ومشيوا ورانا قمار خلف قمار
وهيك ابتدينا وابتدا من جديد
تحت الهوى وفوق الهوى المشوار .
كل عام وصرح سوا ربينا بكل مَن فيه بألف خير بعام جديد وأمل جديد وفرح جديد ومحبة جديدة
د. عيسى فضة
ليست هناك تعليقات:
إرسال تعليق