اصبر يا قلبي
////////////
اصبر ياقلبي لا تزيد علية
بركي ياعيني من الدمعات
نشكي لعذاب صبحة وعشية
من فراق لميمة من ذا الحياة
يالميمة درتيها بية
اعلاش رحت وغبت علية
الدمعة ع لخد مجرية
يا ذا الليلة كثروا المحنات
يا فراق لميمة اصعيب علية
واش ايصبرني يالولية
الحضن الحنين كي غاب علية
وحدي راني نعاني الليعات
يالموت... يالغدارة
اعلاه اديتي الميمة اخسارة
نبكي الليل... مع النهار
ما طفات يما لهيب الجمرات
يالميمة ..يالحنينة
اعلاش رحت وغبت علية
ياك انت العزيزة علينا
ما طقت فراقك للممات
اصبر يا قلبي خفف اعلية
حرقوني دموع عينية
ياللي راح ما يولي لية
غاب وراح نجمتو اطفات
يالميمة صورتك في بالي
الحنينة ما تفارق خيالي
يالعزيزة اكثر
تهوالي
النوم اجفاني من عيني
ما نبات
يا ربي ارحم لميمة
بجاه النبي ابن حليمة
راه مومنة تخاف ربي ديمة
ارحمها بواسع الجنات
شعر شعبي
رثاء امي
عليجة عبادلية 🇩🇿💚
كتبتها في. سنة 2000
ليست هناك تعليقات:
إرسال تعليق