..يا دنيا كفاية تربية..
عشت فيها بإنسانية
طفحت الدم في دروبها
و لا خمنت سوء نية
و لا إحتمالات لترتيبها
مشفتش منها حنية
مكنتش من محاسيبها
و مشربتش لها مية
و لا فتحت لي أبوابها
صبرت والصبر شوية
رضيت بوعدها ونصيبها
يا دنيا كفاية تربية
عذاب مسقي بعجايبها
دفعت الجزية و الدية
مستوفي كل ضرايبها
طول عمرها جية علية
و بقدرة الله ب أغلبها
بتهدي همومها مجاني
ل ناس..اليأس دوبها
و دنيا الفرح نسياني
و فكراني ب ألاعيبها
و داب قلبي بأحزاني
و شكلي غير حبايبها
أنا بأكرهها تعباني
وكله يدوب في دباديبها
غريب والضلمة عنواني
و مطحون من تجاربها
دى غير بري واحساني
وعمري ما كنت بأحسبها
فيه ناس الدنيا خدعتها
سابت مالها و مناصبها
و ناس الفقر أذمتها
و عمر الفقر ما يعيبها
و ناس القسوة ذلتها
طمعها فالدنيا صايبها
و ناس الصدفة رفعتها
كانت بتشق في جيوبها
بتيجي تصب سفاهتها
في ناس الكون مغلبها
و ناس مش لاقية لقمتها
و لو هتموت ما تطلبها
و ناس ضاعت في خضتها
و ناس غرقت مراكبها
و ناس عاشت بحسرتها
تخاف من ناس بترعبها
و ناس الدنيا لعبتها
بتختار اللي يعجبها
و ناس كفرت بدنيتها
سايقها شيطانها و راكبها
بقلمي.علاء سعيد
ليست هناك تعليقات:
إرسال تعليق