/ و - ط - ن / محكي
يا ابني تلات حروف بيصيرو وطن
اشتري ولا تبيع ولو غلّوا الثمن
تصوّر عند ما طل ألله ع الوجود
من فوق من باب السما طل وزرن
وجاب المدى للكون حطلّو الحدود
من يومها شمّر عن زنودو الزمن
وصار بكرامة يحفر بمعول خلود
بتراب أرض الشام تا عمّر وطن
و - بالواو وقّفلي ع برج سهيل
تا نقطف من الليل نجماتو
شد الوقت واكبح جموح الليل
وجيب الشمس ع خيول عتماتو
كون الحصن من كل ميل وميل
ومتل النسر علّي ع غيماتو
وعمّر وطن بالروح واكتب ع الحياة
هيدى أنا وهوّي الوطن ذاتو
ط - بالطه طمنّي عن الإنسان
وضلّك معي ع الخط بالعالي
كب العتم بمغارة النسيان
تتضل شمسك طالعة قبالي
خود الصلابة من صخر صوّان
وجيب الليونة من هوا شمالي
وابني الوطن واعطيه من روحك غلا
تتكون بعيون الدني غالي
ن - بالنون نسّيني شقى الأيام
وحنّي بِلون الشمس صابيعك
وقبل ما ينطفي سراج الكلام
بدي بنصيحة ودعك رح قول
لو بعت ذرة من الوطن . . .
يعني الوطن بالرخص بيبيعك .
- عيسى فضة -
ليست هناك تعليقات:
إرسال تعليق