عمر مسروق.
يا عمرنا لْ عم تنسرق
طاير بمهب الريح متل الورق
مابقيت جبال تصد الريح
ولا قشّة تنقذك من الغرق
يا عمرنا لْ عم تنسرق.
آهاتك ما بظن حدا عم يسمعا
وعيون من القهر هايج مدمعا
بلحظة بتمرق الفصول الأربعا
شاب الربيع والصيف احترق
يا عمرنا لْ عم تنسرق.
شو تقطّعت حبال الأمل
وجنازات حلم ما اكتمل
وغريق صار يخوّفو البلل
يعصر شرايينو لآخر رمق
يا عمرنا لْ عم تنسرق.
عم ننطر تَ يجينا بكرا
حامل بجيابو شي فكرا
بلكي نصحا من السكرا
تَ نقول هالمرة صدق
يا عمرنا لْ عم تنسرق.
.. محمد عزو حرفوش.
ليست هناك تعليقات:
إرسال تعليق