براءة حلم.... للمبدع محمد عزو حرفوش

.. محكيّة ..

.. براءة حلم ..

بعدك صغيره/ي ..

وشو حلمك طري .

غاب القمر ..

كيف بدك تسهري .

شوفي السما ..

شو معبّقة أسرار ..

لا طيور ملوّنة ..

لا عطر لا أزهار ..

غير الحلم الطري ..

ما فيكِ تغمري .

تراب الأرض ..

مشقشق وعطشان ..

مقهور ع كلّ ..

البشر عتبان ..

حتّى المطر ..

غافل ونسيان ..

لا تستعجلي يا صغيرة ..

إنّك تكبري .

ضلّي بريئة ..

مفتحةْ .. 

متل الورود ..

متل حنان الأم  ..

ما بيعرف حدود ..

متل غصن زيتون ..

متل شي عنقود ..

ناطر أيلول ..

تيدوب وتعصري .

ماضل فراشات ..

لا تزعلي ..

وعن ظلم الكبار ..

لا تسألي ..

اضحكي والعبي ..

لا تدبلي ..

بيعي عقارب الوقت ..

أو كسّري  .

نامي وغطّي ..

حلمك بالرموش ..

خبيه تا ما تسرقو ..

الوحوش ..

ادعي ل الله  ..

من فوق العروش ..

تضلك سعيده/ي ..

وما تتعتّري .

.. محمد عزو حرفوش ..