يا شام مدّي شرشف الغفران
وغطي الوطن وتزنّري بفرسان
عيد الفصح عرسك فرح شامي
حنّي الأيادي تكحّلي بنيسان
برمضان الخير باعتلك سلامي
مطرّز بتقوى الروح والإيمان
حملنا الصليب بنور إسلامي
وصار الصليب يعانق القرآن
نصلّي لألله بعيد القيامي
يقوم الوطن من فرشة الأحزان
جايب أماني وجيت لا تنامي
تا عايدك يوم المعنى وفزعان
يمرق عتم مجنون قدامي
واتفركش بدمعة طفل جوعان
واتزحلق بضحكات الحرامي
واتدحرج بوادي زمن خرفان
وموعود تخلص كل آلامي
وإنتي معي رح غافل النسيان
بعيد المسيح وزور أحلامي
انشالله بعد ما تغيّر العنوان
وموعود رح يولد وطن سامي
من جديد أحلى كتير مما كان
وعيد الفصح عيد الفطر ينعاد
وتبقى سوريّا أم للأعياد
ونرجع سوا يا شام على بر الأمان . عيسى فضة
ليست هناك تعليقات:
إرسال تعليق