آخ منك يادني..... للمبدع عيسى فضة

(  آخ منك يادني  ) 
عتبي عليكي يادني
ونحنا بعمر السوسني
سرقتي الطفولة والأمان
وختيرتي فينا الولدني
لا القلب قادر يشتكي
والصمت نسّانا الحكي
بتمرق سني خلف السني
وبعدو الجرح مفتوح
وفيكي حمام الدوح عم بينوح
وضهر العمر مطعوج مايل منحني
ولك آخ منك يادني
من وين جيتي وين كنتي كيف صرتي ؟؟
لا كنت أعرف مين أنا
من الموت جايي والشقاوة المزمني ؟
ولّا أنا عَ الموت رايح يادني !!!
يمكن أنا الإنسان
راكض متل فزعان من فزعان
وطالع على الأحلام
تا إرتكي عَ النوم بلكي بنام
ويمكن أنا صاحي على غفلان
عم إغزل مراجيح منسيّي
تا مرجح النسيان بالنسيان
لا كان فينا نهدّ أسوار الحزن
ولا بإيدنا نعربش على الحيطان
لا تضحكي يا هالدني من حيرة الإنسان
وإنتي عَ خمر الآه صرتي مدمني
كلّك وهم كلّك حكي وجنان
ومع كل لحظة بلون عم تتلوّني
ولك آخ منك يادني .              عيسى فضة