الحب الحقيقي/ محكيّة
الحبّ الحقيقي بعرّف فيه
بقلوب الكانت عشقانة
روميو قلّي شو المطلوب؟
جولييت صارت تعبانة
ما عاد فيني غطّي عيوب
ختيرت وصارت كحياني
وقيس بطّل المحبوب
من ليلى وعشقت تاني
قالتله مش من مكتوب
بدّك تكسب حناني
لازم تمشي تعدّي دروب
وشي هديّة تكون حرزانة
وعبلة قالت لعنتر
حاج بسيفك تتمختر
روح اشتغلّك شغلة
تناكل يابس أو أخضر.
وماري قالتله لبيار
انشالله مفكّر حبّيتك
كان همّي جايزة نوبل
وشهرة وفوتّي عا بيتك.
وشهرزاد حميت راسا
بقصصها المشهورة
حاجي تحكوا وتقولوا
وحاجي تبيضوا هالصّورة
الحب بزمانه ما كان
طهر ونقاوة وحنان
الحب من جوّا صخرة
قدر يصيّرها تحفة
خفّة أنامل فنّان.
صدّقتوا إشاعة بتنقال
غدر وكره وضغينة؟
وما فكّرتوا إنّه الحب
فرح عيون الحزينة
هوي أمل اليأسان
وللتّعبان السّكينة
ما تزعل، تحقد وتثور
الحب بيعطيك القوّة
هو القوّة الدّفينة.
أمّا عندي شي تاني
الحب بعمره ماله مثيل
حبّي منّه أسطورة
ولا بلاقي عنّه بديل
حبّي مش نسبة وميزان
ولا بحاجة أعطي دليل
انحفر بقلبي
انغرز بدمّي،
مشي بعروقي
وبعدا روحي صفيّة
وبالحب بلاقي الأمان.
عبير عربيد
ليست هناك تعليقات:
إرسال تعليق