آه يا غربة...( محكيّة)
آه يا غربة عقلبي
إنتِ حجر صوّان
سرقتيني من حالي،
وسرقتِ منّي الزّمان،
سرقتِ منّي عمري،
ونسيتي اللّي كان
بعمري البهجة والفرحة،
ريحة الفل،
عطر الياسمين،
زهر الرّيحان
وما عادت عيوني تشوف
غير قحل،
صحرا، رمل،
وشويّة حيطان.
بعدتيني عن أغلى النّاس،
اشتقت لصدرك يا إمّي،
يغمرني بحبّ وحنان
اشتقت للمّة إخواتي،
ولولادي أزاد ورزام
اشتقت شارك أترابي،
بالفرحة أو بالأحزان.
واشتقت ضوّي شمعة
عتربة بيّي وخيّي
وإشهق وإبكي،
وإذرف دموعي مع همّي
وبعدا أركض
عترابك وعشبك يا بلادي
وأطلب منّك السّماح،
عغدري لعشقي لأرضك
اللّي بيوم عليّي
رخص وهان.
عبير عربيد
ليست هناك تعليقات:
إرسال تعليق