ناديتها
يللي حسنك شابه إسمك
والناس ينادوك جميلة/ي
هلا تحننت عليّا بقبلة
من الثغر العسول تسمحيلي
ردت
يللي بعيونك لمحة سهد
ولسانك عم يقطر شهد
ياهلا تكرم عينك ياورد
حدا قلك عني بخيلة/ي
لحظة وزاحت ل خمار
ظهر جبينها بدر الأقمار
ضوا الليل و صار النهار
قتلوني عيونها الكحيلة
حرارة شمس تسكن خدودها
بيدي لمست وجنات ورودها
وعد الروح والسبيل بجيدها
دخيلك يا أم النور اشفعيلي
رب عجن الضلع وزاد حصة
عمل منها أنثى وكمل القصة
حلقي نشف و علقت بغصة
لمّا بالغنج تتمايل آه ياويلي
من فرط الهوى صاير سقيم
الفكر جهلان تعبان و عقيم
الله ل بيسامح هو الرحيم
أبدع بحوا و حطها مقابيلي
العقل داخ بدنياي و الأديان
اغويت بمكر وشرع النسوان
بهذا الزمان لكل لحظة ديان
أنا حسابي مفتوح مقابيلي
تاهت روحي بين جد و لعب
دخلت بدوامة والقرار صعب
قررت إتحدى الدنيا بالغصب
لو على درب جهنم توديلي
.. غانم ع الخوري ..
ليست هناك تعليقات:
إرسال تعليق