/ العيد وأحوال الدني /
يا عيد لاقيلي على راس السنة/ي
حوّل معي تنشوف حالة حالها
الليلة أنا غربلت أحوال الدني
وفضّيت أيام السني بغربالها
وبلّشت هز بهالخوالي المحزني
وتدحرج الآهات فوق خيالها
شفت الوقت ختيار ماشي منحني
وعكازتو ع الجرح حطا وشالها
لقيت الأرض بالبهرجات مزيني
والجوع عامل مهرجان قبالها
وفوق الفقر بتمر دعسات الغني
وصهلة فرس بتنوح عا خيّالها
عيون العشق عالهجر صارت مدمني
وأهل الأماني جرّحوا موّالها
وضاع الأمل وتشرّد الحلم الهني
ونسوان عم تمشي ع ضهر رجالها
وسمعت صرخات الوجع بالولدني
غرب وشرق وجنوبها وشمالها
ماضل بالغربال غير راس السني
وعا شجرة الميلاد عالق شالها .
كل عام وجميع مَن في سوا ربينا وكل سوريتنا الحبيبة بألف خير وسلام وأمان ووئام .
ليست هناك تعليقات:
إرسال تعليق